الفنانة آثار الحكيم ظهرت بالصدفة بعد غياب طويل عن الأضواء، لكن المرة دي اللي لفت الأنظار مش مجرد رجوعها للظهور، إنما التغير الكبير اللي ظهر على ملامحها بعد مرور السنين.. تجاعيد واضحة رسمت تفاصيل وشها، وملامح العمر بقت حاضرة بقوة، وخلت الجمهور يحس قد إيه الوقت بيعدي وبيسيب أثره حتى على نجوم الشاشة.
آثار الحكيم ظهرت بالصدفة وسط الجمهور في مسرح البالون، لحضور عرض مسرحية «نوستالجيا 90/80»، مع مجموعة من أصدقائها، ومن غير أي ترتيبات مسبقة مع إدارة المسرح أو الفنان تامر عبد المنعم. لكن المفاجأة كانت بعد انتهاء العرض، لما تامر عبد المنعم اصطحبها على خشبة المسرح، وسط استقبال حافل وتصفيق من الجمهور، واللي استقبلها بحب كبير، لدرجة إنها مقدرتش تتمالك دموعها من شدة التأثر والفرحة.
آثار أكدت إنها تشبعت من الأضواء، وإن قرار الاعتزال مستمر، وإنها مش ناوية ترجع للتمثيل، رغم كل الحب اللي لسه بتشوفه من الجمهور بعد 15 سنة من الغياب. ولو رجعنا لورا علشان نشوف حكاية آثار الحكيم هنلاقيها عاشت حياتها كلها بين جدران المحاكم بسبب خلافاتها مع طليقها وأبو أبنائها اللي قدر ياخد الحضانة منها وعاشت سنين من غير ما تشوفهم وهما بيكبروا قدام عنيها.
تعالوا نعرف تفاصيل وكواليس خلافات آثار الحكيم مع زوجها الأول. أثار الحكيم عاشت طول حياتها في معركة حماية ولادها؛ ولقت نفسها فجأة في وش حرب قضائية حرمتها من أولادها وهددت استقرارهم! بدأت الحكاية بضربة قاسية لما صحيت بعد أكتر من 10 سنين جواز على صدمة طلاقها غيابي من غير أي مقدمات. الجوازة اللي بدأت سنة 1987 من محمود مجدي جودت وأثمرت عن 3 أبناء، تحولت فجأة لساحة معارك قضائية ما بتنتهيش. الموضوع ما كانش مجرد انفصال عادي، ده دخل في خلافات كبيرة وحرمان من رؤية ولادها لفترة طويلة، وعاشت وجع الأم اللي مش عارفة توصل لأطفالها. لكن آثار ما استسلمتش، وفضلت تعافر في المحاكم عشان استقرارهم، لحد ما أصر الأولاد إنهم يعيشوا معاها واستردت حضانتهم بحكم قضائي. ورغم إنها كانت شايلة كل المصاريف، استمرت الضغوط والتهديدات بنقلهم من مدرستهم الدولية، واضطرت تلجأ للقضاء مرة تانية عشان تحميهم.
ولما حبت تبدأ حياة جديدة واتجوزت سنة 2006 من الإعلامي ياسر خليل، الخلافات اشتعلت أكتر، واستغل طليقها الموقف عشان يرفع قضايا وياخد الحضانة من جديد، وده أثر بشكل كبير على نفسية الأولاد ومستواهم الدراسي، لكنها فضلت واقفة زي الجبل ودافعت عنهم لحد ما رجعتهم لمدرستهم بحكم جديد.
المعارك القضائية والخلافات دي كانت هي السبب الحقيقي ورا تحول مسار حياتها. آثار الحكيم اللي قدمت أعمال نجحت بشكل كبير وخلتها واحدة من أهم وأبرز نجمات جيلها، قررت فجأة تبعد تماماً عن الشاشة والأضواء، وتختفي عن البرامج والسوشيال ميديا.
قرار الاعتزال ده خلا الكل يتساءل: ليه تبيع الشهرة والنجاح وتختفي بالشكل ده؟ المفاجأة إنها بعد غياب طويل كشفت إن اعتزالها بقاله حوالي 20 سنة، وأن قرارها جه وهي في قمة النجاح. لا كان فيه خلافات في الوسط الفني، ولا الموضوع له علاقة بشائعات حرمانية الفن، لكنها ببساطة وصلت لمرحلة اكتفاء من الشهرة، وحبت تفرغ حياتها وعمرها لولادها وأسرتها. كانت شايفه إن الحياة قصيرة جداً، وأن الإنسان لازم يفهم هو عايش ليه وإيه هدفه الحقيقي، واختارت إنها تشتري استقرار بيتها وراحتها على حساب النجومية.
سنين طويلة من المحاكم والحرمان، انتهت بأحكام نظمت الحضانة والمصاريف، وخرجت منها آثار الحكيم بمثال حي لقصة أم ضحت بأكبر وأهم نجومية في سبيل ولادها واستقرارهم.
