أنا قعدت أسأل نفسي: ليه بطلة فيلم «الاعتراف الأخير» مسيحية، مع إن المنطقة دي بالذات منطقة شائكة عندنا كمصريين؟ لحد ما عرفت أصل قصة الفيلم.
القصة بتعتمد على شائعة انتشرت في السبعينيات عن سائق تاكسي أوقفته فتاة ترتدي ملابس بيضاء، وطلبت منه يوصلها إلى حي الشاطبي. وبمجرد وصولها إلى منطقة مقابر المسيحيين، قالت له: «استناني هنا، هدخل أجيب حاجة من جوه».
وطبعًا الراجل مكنش عارف إن المكان ده مقابر المسيحيين. ولما الانتظار طال، نزل من العربية عشان يحصل على أجرته، فاكتشف إنه واقف أمام المقابر، وإن عليها سلسلة تمنع دخول الزوار.
وهنا انتشرت الشائعة في إسكندرية كلها عن الفتاة المسيحية التي تعود ليلًا وتستقل سيارات الأجرة للعودة مرة تانية إلى مقبرتها.
لكن أغلب الظن إن البنت دي حبت تتهرب من سائق التاكسي، فنزلت في الشارع المظلم اللي فيه المقابر، وقالت لنفسها إن السائق هيتفاجئ لما يعرف إن المكان اللي طلبت منه ينتظرها فيه هو المقابر، وده تقريبًا اللي حصل.
الشائعة دي لفتت نظر المخرج أنور الشناوي، فقرر يعمل معالجة سينمائية للقصة، وقال: طب لو خلينا البنت المسيحية دي روحها مرتبطة بالأرض بسبب حبها لشخص معين، وظهرت له لأول وآخر مرة عشان تريحه من معاناته بعد رحيل زوجته اللي كان بيحبها جدًا، لكنه مكنش يعرف إنها لم تكن مخلصة له؟ فتظهر له عشان تكشف له حقيقة زوجته، وفي نفس الوقت تعترف بحبها ليه.
طب ثواني كده… هي القصة دي مبتفكركش بحاجة؟
بالضبط! فيلم «مع الذكريات» لأحمد مظهر، اللي كان حزين ومنعزل بعد رحيل خطيبته، لحد ما يظهر له الأحدب ويحكي له كل حاجة، ويخبره إن خطيبته كانت على علاقة بشخص تاني، فيبدأ بعدها يخرج من عزلته ويرجع يعيش حياته.
نرجع تاني لفيلم «الاعتراف الأخير»، واللي المخرج عمل فيه حيلة ذكية عشان محدش يعرف إنها قصة الشاطبي الشهيرة. وهي إنه ما أشارش ولا مرة إلى إن سميرة مسيحية؛ حتى اسمها كان سميرة عبدالله، وزوجها المهندس نادر.
ومبنعرفش إنها مسيحية غير لما تدخل المقابر، ويدخل بعدها نور الشريف يدور عليها، فيلاقي صورتها واسمها.
وأنا فعلًا مش عارف إذا كان إخواتنا المسيحيين زمان بيحطوا صور على مقابرهم ولا لأ؟ بس لو كانوا بيعملوا كده، يبقى ده سبب تاني خلّى المخرج يختار إن سميرة تكون مسيحية.
